Monna oa Nts’upe Phuthing, Mokhotlong, o matsohong a sepolesa sa Tlokoeng Mapholaneng, ka mor’a ho inehela ho sona a e-na le setopo sa monna oa Mainyatso hona seterekeng seo, ee a mo khakhathileng ka pelaello ea hore o ne a bokana le oa hae oa litjepa, ka Labobeli la beke ena. Mookameli oa sepolesa sa Tlokoeng, monghali Mpho Khoanyane, o re tlaleho e re ’melaelloa o ile a fumana puisano ea monna le mohats’ae, a ipha leeto, ’me a khutla a se a ikhakantse, ke ha a tla ba fumana haha ba le khohloaneng e Koting, a bata monna ka lejoe, eare ha a oa fats’e, a mo masola ka molamu ho fihlela a se a se na matla. O re ’melaelloa o ile a letsetsa koloi ea lephele, ka sepheo sa ho mo isa ngakeng, empa haa elelloa hore ese ele maobane, a inehela sepoleseng le sona setopo seo.